Politica

Mia posiziun politica:

Economia / plazzas da lavur

Curaschi ed engaschament d’interprendider èn il motor da noss svilup economic. Per promover els sto l’administraziun esser orientada a la prestaziun da servetschs. Il svilup demografic e la mancanza da persunal qualifitgà èn grondas sfidas. Il potenzial da dunnas sco persunal spezialisà e da direcziun sto vegnir nizzegià meglier. Ina schanza istorica ha il Grischun cun la digitalisaziun e cun models da lavur ibrids. Quai simplifitgescha dad entusiasmar umans giuvens per il Grischun e dad avair uschia las persunas qualifitgadas en nossas regiuns.

Dal reminent: Smartvote mussa che Martin Bühler represchenta il meglier da tut las persunas che candideschan per la regenza grischuna ils interess da l’economia grischuna.

Energia / persistenza

Svilup economic e persistenza na stattan betg en cuntradicziun. Il Grischun ha gia blera cumpetenza en il sectur da la forza idraulica. Quest know-how savain nus transferir sin ulteriuras funtaunas d’energia regenerabla (solar, vent euv.) e promover uschia l’innovaziun. La producziun dad energias alternativas ans maina al medem temp en il champ da conficts cun ils interess da la protecziun da la natira e da la cuntrada e da parts dal turissem. Tar tut ils pass da svilup vala pia: las meglras soluziuns naschan cun integrar gia baud tut las gruppas d’interess.

Turissem

Pervi da la midada dal clima ed ils basegns modifitgads dals giasts è il turissem en ina fasa da transfurmaziun. Il success per l’avegnir vegn garantì cun flexibilitad e l’abilitad da s’adattar a las novas reglas dal gieu dal martgà. Per quai dovra la branscha da turissem bunas cundiziuns generalas, mesiras da promoziun cun cleras finamiras ed ina realisaziun intelligenta da la planisaziun dal territori.

Furmaziun

Il Grischun è s’etablì sco in lieu multifar per furmaziun, perscrutaziun e per scolas autas. Quai duai vegnir rinforzà vinavant. Perscrutaziun e furmaziun èn la funtauna per novas ideas e furman il fundament per persunas qualifitgadas da damaun che nus duvrain tant per nossa economia sco per nossa societad. Per las scolas grischunas sin tut ils stgalims munta la digitalisaziun ina gronda schanza per in sectur da furmaziun decentral. Questa digitalisaziun sa vegnir nizzegiada anc pli ferm. Per l’avegnir ston ins era examinar las structuras dal di per correspunder als basegns da la famiglia d’ozendi.

Sanadad

Il provediment da la sanadad è in servetsch da basa central per giuven e vegl ed in factur da domicil impurtant per mintga vischnanca. Cun ina collavuraziun rinforzada da las instituziuns da sanadad pudessan sa furmar centers regiunals cun in vast spectrum d’incumbensas che lavuran cun success. Quai na pussibilitescha betg mo in provediment da basa cumplet en las regiuns, ma procura era per plazzas da lavur decentralas d’auta qualitad.

Segirtad

Catastrofas da la natira, pandemias, attatgas digitalas, terrorissem – smanatschas san avair bleras furmas e succeder surprendentamain. La clav per in agir prudent e premurus è ina buna collavuraziun interchantunala da l’administraziun e da la politica, da las organisaziuns d’intervenziun d’urgenza, da la protecziun civila e dal militar. En situaziuns da crisa sco la pandemia da Corona u da la bova da Bondo, è sa mussà ch’ina stretga collavuraziun cun ils pertutgads e cun persunas spezialisadas chaschuna meglras soluziuns che concepts strategics da la tur d’ivur.

Multifariadad

Il Grischun è il chantun da la multifariadad. Nossas 150 valladas, las trais linguas chantunalas e nossas tradiziuns muntan in stgazi da cultura incumparabel che sto vegnir tgirà e promovì. La politica surpiglia ina rolla equilibranta ed integranta uschia che la multifariadad sa po sviluppar vinavant. Noss Grischun da l’avegnir duai esser giagl, varià e viv.